Fjöldi Íslendinga tók þátt í friðsamlegri mótmælagöngu í dag þrátt fyrir kulda og hvassviðri í miðbænum. Viðburðurinn var þáttur í alþjóðlegum mótmælum, World Wide Rally for Freedom, sem milljónir manna tóku þátt í um allan heim.

Í Reykjavík var gengið frá Stjórnarráðinu, upp Hverfisgötuna, niður Laugaveg og á Austurvöll þar sem Martha Ernstsdóttir og Ágústa Eva Erlendsdóttir fluttu ræður.

Martha las meðal annars upp færslu frá hjúkrunarfræðingi sem sagðist aldrei hafa kynnst öðru eins bóluefni og Covid ,,bóluefnum,“ þau gerðu í raun allt annað en það sem þau áttu að gera, þ.e. að búa til ónæmi. Og aldrei hafði hjúkrunarfræðingurinn kynnst bóluefni þar sem þarf að vera með grímu og halda fjarlægð frá fólki þrátt fyrir að vera fullbólusettur.

Ágústa Eva rifjaði upp búsáhaldabyltinguna og Icesave, sagði Ísland enn vera frjálst samfélag en að frelsi okkar og sjálfstæði væri verulega ógnað. En þetta væri sama stríðið, hluti II.

Hvað bólusetningar varðaði þá væru allar forsendur fyrir þeim brostnar, þær stöðvuðu ekki faraldurinn, stöðvuðu ekki smit og leiddu ekki til hjarðónæmis.

Hún bað þjóðina að standa upp og vera "demo" um það hvernig kerfið getur ekki kúgað fólkið.

,,Okkur er kennt í skóla að hlýða, en við ætlum ekki að hlýða...og eitt sem þið getið ,,gúgglað“ er að óþekku börnin breyta heiminum, þau hafa alltaf gert það og gera það enn.“

Ræðurnar má sjá hér neðar í fjórum hlutum (smellið á myndir til að spila).