Eftir Ingibjörgu Gísladóttur:

Yfir saksóknari Indianafylkis, Todd Rokita, hefur stefnt móðurfélagi Black Lives Matter til að fá það upplýst hvort framlög frá íbúum fylkisins hafi farið þangað sem þeim var ætlað að fara, en ekki í vasa leiðtoga samtakanna. Í skýrslu samtakanna 2020 mátti sjá að þau hefðu safnað 90 milljónum bandaríkjadollara, eytt 8.4 milljón í starfssemi samtakanna og veitt 21.7 milljónum til staðbundinna samtaka, en þá á eftir að gera grein fyrir um 60 milljónum.

Fyrr í apríl birtist frétt í New York Magazine um að leiðtogar BLM hefðu keypt stórhýsi í Los Angeles í október 2020 fyrir 6 milljónir dollara og áður hafði fréttst af fjórum húsakaupum leiðtogans, Patrisse Cullors auk þess sem sambýliskona hennar hafði staðgreitt hús í Kanada. Hafi framlög til BLM farið til einkanota leiðtoganna þá er það refsivert samkvæmt lögum Indiana.

BLM samtökin hafa valdið verulegum skaða

Samtökin voru stofnuð 2013 af þremur svörtum LBGTQ konum eftir að fjölmiðlar höfðu farið hamförum yfir dauða Trayvon Martins og útmálað varðmanninn George Zimmerman sem hvítan rasista (var skráður af rómönskum ættum).

Eftir dauða George Floyd mögnuðu fjölmiðlarnir aftur upp æsing um rasisma hvítra löggæslumanna (án nokkurra sannana) og kostnaður af óeirðunum er talinn nema 2 milljörðum bandaríkjadollara.

Hverfi svartra voru lögð í rúst og morðum svartra á svörtum fjölgaði mjög. Samkvæmt Bloomberg hækkaði morðtíðni svartra Bandaríkjamanna úr 22.9 af hverjum 100.000 árið 2019 í 30.7 af hverjum 100.000 árið 2020 (hækkaði úr 3.2 í 3.8 yfir landið), auk þess að talið er að 23% fleiri svartir hafi látist í umferðarslysum það ár en árin á undan.

Líklegt er að Ferguson áhrifin svokölluðu eigi hér einhvern hlut að máli en með þeim er átt við tregðu lögreglumanna til að hafa afskipti af svörtum brotamönnum sakir fjandskapar þeirra við lögregluna. Gengjameðlimir fá því frekar að skjóta hver annan í friði og svartir hraðaksturskappar eru síður stöðvaðir. Lélegt ástand vega á þó eflaust hlut að máli.

Miðað við allan þann skaða er samtökin ollu (ásamt fjölmiðlunum og Antífa) þá skyldu menn ætla að leiðtogarnir myndu vilja reyna að bæta hann með söfnunarfénu að einhverju leyti en kannski eru þær hreint ekki vel innrættar. Átrúnaðargoð þeirra, Assata Shakur sem var í Svarta frelsishernum, tók jú ungan, varnarlausan þjóðvarðliða af lífi með köldu blóði auk þess að stunda bankarán og fleira.

Meðlimir BLM ganga í bolum með áletruninni "Assata Taught Me" og einnig hafa þeir málað stóra götumynd af henni í Palo Alto, Kaliforníu. Kannski var það aldrei hugmyndin að bæta hag svartra Bandaríkjamanna - bara eigin hag.