Bandaríski rannsóknarblaðamaðurinn John Dougan, kveðst í viðtali við RT hafa fengið send gögn frá samhæfingaraðila BALTOPS 22 æfingar NATO sem sýni fram á aðild Bandaríkjanna að hryðjuverkinu á Nordstream 1 og Nordstream 2 gasleiðslunum, þann 26. september á síðasta ári.
1/2 Former US Marine John Dugan told RT that evidence of US involvement in the Nord Stream bombing was given to him by anonymous mail from the BALTOPS exercise coordinator. pic.twitter.com/91QrRHorhS
— Victor vicktop55 (@vicktop55) February 21, 2023
Dougan segist hafa fengið gögnin með tölvupósti, nafnlaust í hendurnar í gegnum samskiptamiðil sem hann tilgreindi ekki, strax í október í fyrra. Þau væru frá NATO-liða sem tók þátt í framkvæmd BALTOPS 22 æfingu NATO á Eystrasaltinu í júní 2022.
Þetta kemur fram í framhaldi af umfjöllun Seymour Hersh, bandarísks verðlaunablaðamanns um málið, sem Fréttin fjallaði fyrst um og birti heildarþýðingu á. John Dougan greindi frá málinu í streymi strax í október 2022. Hér er Youtube-myndband hans því til staðfestingar, birt fyrir 4 mánuðum.
Samkvæmt tölvupóstinum, sendi þyrla þann 15. júní í fyrra, hóp af bandarískum köfurum á æfinguna. Þeir skáru sig nokkuð úr, í borgaralegum fatnaði á æfingasvæðinu.
„Fyrsta hugsun mín var sú að þeir litu út eins og hópur hryðjuverkamanna,“ skrifaði heimildarmaðurinn og talaði um sérstaka klippingu einstaklinga í hópnum, yfirvaraskegg og skegg, og skort á sjáanlegum merkingum, það er að segja ytri hernaðarskilríkjum.
Var skipt um karlinn í brúnni fyrir æfinguna?
Varaaðmíráll bandaríska Sjötta herflotans og hópur óeinkennisklæddra einstaklinga hafi tekið á móti köfurunum. Heimildarmaðurinn hafi ekki heyrt smáatriði samtals þeirra vegna hávaða frá þyrluspöðunum. Yfirmaður Sjötta flotans á BALTOPS 22 æfingunum hafi verið varaaðmírállinn Eugene Black. Varaaðmírállinn Thomas Ishee hafi tekið við af Black í september sl. Heimildarmaðurinn hafi ekki útskýrt hvort Black væri varaaðmírállinn sem mennirnir ræddu við.
Heimildarmaðurinn hafi tekið eftir MK29 enduröndunarkerfum hermanna, sem nota súrefnis- og helíumblöndu fyrir djúpsjávarköfun. Hann tók einnig eftir því að mennirnir voru með annan dýran hágæðabúnað sem ekki var í notkun hjá venjulegum herdeildum sjóhersins og að þeir höfðu með sér litla kassa, með óþekktu innihaldi.
Mennirnir hafi sagst vera þátttakendur í „sprengjueyðingaræfingum“ sem áttu að fela í sér siglingu með litlum gúmmíbáti á tiltekinn áfangastað, til að finna og gera sprengjur óvirkar. Hins vegar virtust kafararnir ekki vera búnir til þess, að sögn heimildarmanns Dougan.
Búnaður sem ekki virðist vera í almennri notkun
Eftir samtal þeirra við bandaríska herforingjann, hafi mennirnir ekki farið á æfingasvæðið, heldur „skildu þeir bátinn eftir og hurfu undir yfirborðið í rúmar sex klukkustundir með öndunarbúnaðinn. Enginn búnaður sé til sem geri kafara kleift að vera neðansjávar í sex klukkustundir. Nýjasti herbúnaður [leyfir] þrjár eða fjórar klukkustundir að hámarki,“ sagði heimildarmaðurinn í tölvupóstinum.
Þegar kafararnir hafi komið aftur upp á yfirborðið hafi þeir ekki lengur verið með kassana dularfullu. Þeir hafi verið sóttir af þyrlu og flogið burt af svæðinu, að sögn heimildarmannsins.
Eldri frásögn Dougan styður við uppljóstrun Hersh
Tölvupósturinn var móttekinn og staðfestur af John Dougan. Hann sagði við Sputnik að höfundur tölvupóstsins hafi sent honum upplýsingar til að staðfesta að hann væri sá sem hann sagðist vera. Þar á meðal mynd af sér frá BALTOPS 22 æfingunni, hernaðarskilríki og vegabréfsmynd. Dougan gat ekki sýnt fram á þessar upplýsingar í þágu þess að vernda heimildarmann sinn. Tölvupósturinn var sendur frá augljósum einnotareikningi (e. burner account), að sögn Dougan.
Ekki verður annað séð en að frásögn John Dougan, nú og þegar í október 2022, sé til frekari staðfestingar á uppljóstrun Seymour Hersh um þetta mál. Hersh greindi m.a. frá því að BALTOPS 22 æfingin hafi verið notuð sem skálkaskjól fyrir hryðjuverkið, skv. sínum heimildum.
Bandarísk stjórnvöld, sem hafa fengið fyrirspurnir vegna málsins, hafa hafnað þessum ásökunum og kallað þær „fáránlegar“ og segjast vonast til þess að rannsókninni á atvikinu miði áfram.
Um John Dougan:
John Mark Dougan er bandarískur rannsóknarblaðamaður og bloggari, sem árið 2016 flúði til Rússlands til að komast hjá rannsókn á ásökunum um að hann væri tölvuþrjótur. Dougan er fyrrum atvinnuhermaður og fyrrverandi lögregluþjónn hjá lögreglunni í Palm Beach sýslu í Flórída, Bandaríkjunum.
Árið 2005 var Dougan staðgengill lögreglustjórans í Palm Beach með aðgang að fyrstu rannsókn á ásökunum Jeffrey Epstein um að hafa misnotað konur og stúlkur undir lögaldri kynferðislega. Hann er talinn hafa haft gögn um einstaklinga í samskiptum við Epstein undir höndunum varðandi málið, meðal annars um Andrés Bretaprins. Gerð hefur verið heimildamynd um hann.
