„Þegar traustið hefur glatast er erfitt að endurheimta það. Fólk sér að heilbrigðisyfirvöld leyna grundvallarstaðreyndum, afneita raunveruleikanum, hunsa nýjar upplýsingar eða það sem verra er, valda því skaða,“ segja Vinay Prasad og John Mandrola í upplýsandi grein í The Free Press, um ástæðu þess að sífellt fleiri líta nú á Covid-19 bóluefnin sem einu skýringuna á skyndilegum dauðsföllum meðal ungs fólks. 

En við vitum ekki, segja höfundarnir, hvort þetta er eina ástæðan. Þótt þeir bendi á að aukin hætta á hjartasjúkdómum vegna bólusetninganna sé vissulega hluti af skýringunni, minna þeir okkur á aðra þætti, þar á meðal banvæn áhrif sóttvarnaraðgerða.

Það er hins vegar skiljanlegt hvers vegna menn snúa sér að þessari einu skýringu, segja þeir. Aðalástæðan er sú hvernig heilbrigðisyfirvöld halda vísvitandi áfram að ljúga. Þeir hafa hunsað allar vísbendingar um aukaverkanir, haldið áfram að stuðla að og jafnvel þvinga ungt og heilbrigt fólk í örvunarskammta, horft framhjá náttúrulegu ónæmi, horft framhjá því hvernig bólusetning eykur frekar á útbreiðslu en að minnka hana, neitað að viðurkenna það gríðarlega vægi sem aldur fólks hefur varðandi hættu vegna veirunnar annars vegar og líkur á alvarlegum aukaverkunum af bólusetningu hins vegar, og reynt að gera lítið úr alvarleika hjartavöðvabólgu þvert á allar staðreyndir.

Niðurstaða Prasad og Mandrola: „Vegna þess að heilbrigðisyfirvöld hafa ekki sinnt skyldum sínum á réttan hátt er það mjög óheppilegt en líka skiljanlegt að margir Bandaríkjamenn snúi sér að Twitter í stað bandarísku sóttvarnastofnunarinnar í leit að upplýsingum.“