Þingflokkar Sjálfstæðisflokksins, VG og Framsóknarflokksins hafa samþykkt tillögu um áframhaldandi ríkisstjórnarsamstarf.
Bjarni Benediktsson, formaður Sjálfstæðisflokksins, verður forsætisráðherra.
Sigurður Ingi Jóhannsson, formaður Framsóknarflokks, verður fjármálaráðherra. Innviðaráðuneytið, þar sem hann sat áður, kemur í hlut Vinstri grænna.
Þórdís Kolbrún Reykfjörð Gylfadóttir verður utanríkisráðherra, eftir stutta viðkomu í fjármálaráðuneytinu.
Þetta kom fram í máli Bjarna á blaðamannafundi formanna ríkisstjórnarflokkanna þriggja í Hörpu rétt í þessu.
Ríkisráðsfundur formlega boðaður
Forseti Íslands hefur boðað ríkisráðsfund á Bessastöðum í dag, þriðjudaginn 9. apríl klukkan 19:00. Þetta kemur fram í tilkynningu frá embættinu.
Fundur fráfarandi ríkisstjórnar hefst sjö en að honum loknum hefst fyrsti ríkisráðsfundur nýrrar ríkisstjórnar eftir stutt hlé.
Komist að niðurstöðu
Bjarni sagði það leiða af eðli máls að endurskipa þyrfti í ráðherrastóla við þessar aðstæður, eftir að Katrín Jakobsdóttir forsætisráðherra hefði farið yfir á annan vettvang.
Flokkarnir hefðu átt góðar viðræður síðustu daga.
„Og við höfum komist að niðurstöðu.“
Mikilvægt að halda ríkisstjórninni áfram
Sigurður Ingi sagði að flokkunum hefði fundist mikilvægt að halda ríkisstjórninni áfram. Nefndi hann það markmið að ná niður þeirri verðbólgu sem verið hefur í efnahagslífinu að undanförnu, og einnig verkefni í tengslum við jarðhræringar á Reykjanesskaga og rýmingu Grindavíkur.
Guðmundur Ingi Guðbrandsson, formaður Vinstri grænna, tók undir með starfsbræðrum sínum og sagði stór og þýðingarmikil mál fram undan á þinginu.
Endurskoðun á örorkulífeyriskerfinu og útlendingamál voru á meðal þeirra atriða sem hann nefndi. Þá talaði hann einnig um almenningssamgöngur og borgarlínuna, sem mikilvægt væri að klára.
Þá kom að lokum fram í máli Bjarna að skipst verði á lyklum og ráðuneytum á morgun.
Að óbreyttu verður kosið í september á næsta ári
Bjarni Benediktsson, verðandi forsætisráðherra, segir ríkisstjórnina byggja á traustum grunni. Það séu reynslumiklir stjórnmálamenn í þessari ríkisstjórn og gott traust á milli forystumanna.
Bjarni svaraði því ekki beint út hvenær næstu kosningar fara fram. Kosningar voru alla jafna að vori þar til stjórn Sjálfstæðisflokks, Viðreisnar og Bjartrar framtíðar sprakk 2017. Síðan þá hefur tvisvar verið kosið að hausti, 2017 og 2021.
„Það er bara álitamál hvort það er einhver ástæða til þess að kjósa að vori en að óbreyttu verður kosið í september 2025.“
Hann sagði að það væri eðlileg krafa að sá flokkur sem fær flest atkvæði í kosningum geri tilkall til að leiða ríkisstjórn. Það væru frávik að láta aðra flokka leiða stjórn og Sjálfstæðisflokkurinn hafi verið sveigjanlegur.
Bjarni sagðist engar áhyggjur hafa af fjármálaráðuneytinu í höndum Sigurðar Inga. Mikil vinna sé búin við gerð fjármálaáætlunar og fleira.
Hvað varðar næstu þingkosningar sagði Bjarni að kosið verði í september á næsta ári að óbreyttu.