Ný yfirgripsmikil rannsókn framkvæmd af Lyfjastofnun Svíþjóðar og norrænna yfirvalda hefur staðfest aukna tíðni á hjartavöðvabólgu aðallega hjá yngri körlum, sem hafa fengið Covid bóluefnið frá Pfizer og enn frekar bóluefnið frá Moderna.
Allt að 15 sinnum fleiri tilfelli af hjartavöðvabólgu komu fram hjá ungum karlmönnum sem höfðu fengið bóluefnið en hjá þeim sem höfðu það ekki. Hættan á hjartavöðvabólgu er meiri eftir tvær sprautur en eina, bæði með Pfizer og Moderna bóluefnin, segir í tilkynningu frá sænsku Lyfjastofnuninni.
Rickard Ljung, prófessor og læknir hjá Lyfjastofnun Svíþjóðar og ábyrgðaraðili rannsóknarinnar sagði:
„Í samanburði við óbólusetta karlmenn á aldrinum 16-24 ára komu upp 4 til 7 umfram tilfelli af hjartavöðvabólgu á hverja 100.000 bólusetta fram innan 28 daga eftir annan skammt af Corminaty (Pfizer) bóluefninu. Eftir seinni skammtinn af Spikevax (Moderna) voru umfram tilfellin á milli 9 og 28.“
Umfram tilfelli á hjartavöðvabólgu meðal karla á aldrinum 16–24 eru 5 sinnum algengari eftir bólusetningu með Comirnaty (Pfizer) og um 15 sinnum algengari eftir Spikevax (Moderna) samanborið við óbólusetta karlmenn á sama aldri.
Hlé gert á bólusetningu haustið 2021
Jafnframt staðfestir rannsóknin að aukna hættu á gollurshússbólgu eftir Covid bólusetningu. Aukaverkanirnar eru þó enn taldar mjög sjaldgæfar. Einnig er aukin hætta á að konur, sem eru bólusettar með mRNA bóluefni, fái hjartavöðvabólgu en áhættan er töluvert minni en hjá karlmönnum.
Í framhaldi af bráðabirgðaniðurstöðum rannsóknarinnar tók Lýðheilsustofnun Svíþjóðar ákvörðun um að gera hlé á bólusetningu með Moderna, haustið 2021, fyrir einstaklinga undir 30 ára.
Flest tilfelli af hjartavöðvabólgu komu fram 7-10 dögum eftir bólusetningu. Engin dauðsföll voru meðal fólks undir 40 ára samkvæmt skýrslunni.
Rannsóknin var gerð ásamt norrænum yfirvöldum og tók til 23 milljóna einstaklinga.
Styrkur norræns samstarfs
Rickard Ljung sagði:
„Hjartavöðvabólga er sjaldgæf og því þarf stærra úrtak til að rannsaka þessi tengsl. Þar sem við búum við svipað heilbrigðiskerfi og umfangsmiklar skrár eru til um þessi mál á Norðurlöndum, þá er hið norræna samstarf styrkur í þessu samhengi.“