Lögreglan á höfuðborgarsvæðinu stöðvaði tuttugu ökumenn vegna gruns um akstur undir áhrifum áfengis- eða fíkniefna á höfuðborgarsvæðinu um helgina.

Nítján þeirra voru stöðvaðir í Reykjavík og einn í Hafnarfirði. Þrír voru teknir á föstudagskvöld, sex á laugardag, sex á sunnudag og fimm aðfaranótt mánudags. Þetta voru sautján karlar á aldrinum 21-64 ára og þrjár konur, 43-58 ára. Sex þessara ökumanna höfðu þegar verið sviptir ökuleyfi og tveir hafa aldrei öðlast ökuréttindi. Til viðbótar stöðvaði lögreglan för sex réttindalausra ökumanna og var þeim öllum gert að hætta akstri.