Í lok maí í sumar fræddi Arnar Sverrisson okkur lesendur Fréttarinnar um Alþjóðaheilbrigðisráðið (World Council for Health), grasrótarsamtök sem voru stofnuð 2021 til mótvægis við Alþjóðaheilbrigðisstofnunina (WHO). Alþjóðaheilbrigðisráðið hefur fundað reglulega frá stofnun og fjallað um fjölbreytileg efni, s.s. sem að nýtt C-19 bóluefni hafi aðeins verið prófað á 8 músum og engum mannverum. Á nýlegum fundi í Austurríki mátti hlusta á stutt og áhugavert erindi sem var ekki um læknisfræðilegt efni heldur um að við séum öll stödd í miðju stríði um sálir okkar.

Fyrirlesarinn var Breti af pakistönskum ættum, Maajid Nawaz að nafni. Hann er trúlega þekktastur fyrir að hafa stofnað Quilliam hugveituna í Bretlandi til að reyna að vinna gegn íslamisma. Hann var íslamisti sjálfur þar til hann lenti í egypsku fangelsi fyrir að reyna að grafa undan þarlendum yfirvöldum og hafði 5 ár til að hugsa um lífið og tilveruna. Frá 2016 og þar til honum var bolað burt frá LBC sjónvarpsstöðinni bresku í janúar á þessu ári var hann þar með þætti um helgar. Ástæða þess að hann hafi verið látinn fara virðist hafa verið „samsæriskenningar" hans um ýmislegt er tengdist kóvídmálum. Í framhaldinu fór hann af stað með sinn eigin þátt, Radical with Maajid Nawaz, sem finna má á Gettr. Þar hefur hann m.a. tekið viðtöl við lækna og vísindamenn s.s. Mike Yeadon, Peter Mc Cullough og Naomi Wolf.

Maajid talar um hvernig stríðin gegn eiturlyfjum, gegn hryðjuverkum, gegn C-19 og gegn loftslagsbreytingum hafi gert stjórnvöldum ýmissa landa kleift að ná sífellt auknum völdum yfir þegnunum. Stríðið gegn fíkniefnum hafi komið óeðlilega mörgum ungum blökkumönnum í fangelsi í BNA og gefið stjórnvöldum þar réttlætingu fyrir afskipti af þjóðum S-Ameríku. Hvað stríðið gegn hryðjuverkum varðar þá virðist það hafa verið fyrirsláttur til að ráðast inn í lönd og varpa sprengjum með drónum, segir hann. Stjórnvöld hafi nýtt sér C-19 til að ná auknum völdum. Í Kanada hafi bankareikningar mótmælenda t.d. verið frystir að skipan stjórnvalda og nú séum við stödd í stríði við CO2. Nýju Smartmælarnir séu hannaðir þannig að yfirvöld geti lokað fyrir rafmagnið til okkar og þau geti einnig stýrt neyslu okkar með hinum rafræna gjaldeyri sem talað er um að koma á - hegðunarstýrikerfi  almennings að kínverskri fyrirmynd sé framtíðin.

Ekki samþykkja þessa sálfræðilegu kúgun, segir hann, og ekki láta reiðina stjórna för þegar það verður augljóst hvaða skaða glóbalistarnir hafa valdið og ætla að valda. Hann bendir á að verstu óvinir múslima hafi verið þeir sjálfir, þeir sem hafa drepið börn, og er þá trúlega meðal annars að hugsa um gíslatöku skólabarnanna í Beslan, Rússlandi.