Eftir Margréti Friðriksdóttur:

Í síðustu viku birtist grein eftir Eld Ísidór þar sem hann vakti athygli á því að Akureyrarkirkja væri að auglýsa námskeið sem ber
yfirskriftina „Litríkt námskeið.” Námskeiðið er einungis ætlað hinsegin börnum.

Ég deildi fréttinni á facebook síðu minni, þar sem ég spyr hvort Akureyrarkirkja sé nú farin að mismuna börnum eftir kynhneigð, nokkuð sem hlýtur að teljast stjórnarskrárbrot. Í það minnsta er oft vísað í 65. grein stjórnarskrárinnar þegar rætt er um jafnrétti hinsegin fólks.

Þjóðkirkjupresturinn Sindri Geir Óskarsson, prestur hjá Akureyrarkirkju, gerði sér sérstaka ferð inn á síðu mína til að skrifa undir fréttina, n.t.t. við athugasemd hjá Bjarna Magnússyni, sem þar hafði skrifað: „Úrkynjaðir prestar geta ekki farið eftir Biblíunni.”

Presturinn svarar: „Farið eftir Biblíunni? Ég held við séum svolítið nær því að lifa í kærleika og friði, en þau sem leggja sig fram í að deila áróðri, hatri og fordómum. Guð blessi ykkur.“

Á þessum tímapunkti vissi ég hreinlega ekki að Sindri Geir væri presturinn sem stæði fyrir hinsegin námskeiðinu sem mismunar börnum á grundvelli kynhneigðar, fyrr en við nánari skoðun. Að námskeiðinu standa lesbískur prestur, tvíkynhneigður prestur, TikTok stjarna og svo transmaður af listabraut Verkmenntaskólans á Akureyri (VMA). Báðir prestarnir tilheyra hinsegin samfélaginu og eru prestar í Akureyrarkirkju.

Ég svaraði innleggi hans og spurði hvort hann væri hræsnari og hvort hann vissi hvaða riti Þjóðkirkjan færi eftir og notar að leiðarljósi.

Sindri Geir svaraði um hæl með þessum orðum: „Það er gott rit, mæli með að þú lesir það og látir af því mannhatri sem litar orð þín.“

Það er nokkuð merkilegt að þjóðkirkjuprestur líti á það sem hatur að vísa í ritninguna og að benda á hræsni þjóðkirkjunnar í þeim efnum. Ég ákvað því að minna prestinn á nokkrar ritningar er lúta að hræsni sem sjálfur Guð okkar kristinna manna hefur andstyggð á.

Hér koma þær:

„Í kenningu sinni sagði hann: Varist fræðimennina, sem fýsir að ganga í síðskikkjum og láta heilsa sér á torgum, vilja skipa æðsta bekk í samkundum og hefðarsæti í veislum. Þeir eta upp heimili ekkna og flytja langar bænir að yfirskini. Þeir munu fá því þyngri dóm.“

Markúsarguðspjall 12:38

„Jesús sagði: En farísearnir, sem voru menn fégjarnir, heyrðu þetta og gjörðu gys að honum. En hann sagði við þá: Þér eruð þeir, sem réttlætið sjálfa yður í augum manna, en Guð þekkir hjörtu yðar. Því það, sem hátt er að dómi manna, er viðurstyggð í augum Guðs.“

Lúkas 16: 14-16

„Vei yður, fræðimenn og farísear, hræsnarar! Þér læsið himnaríki fyrir mönnum. Sjálfir gangið þér ekki þar inn, og þeim, sem inn vilja ganga, leyfið þér eigi inn að komast. Vei yður, fræðimenn og farísear, hræsnarar! Þér etið upp heimili ekkna og flytjið langar bænir að yfirskini. Þér munuð fá því þyngri dóm.“

Mattheusarguðspjall 23:13-15

Presturinn lét sér ekki segjast þegar ég sýndi fram á hræsni í málflutningi hans og skrifaði hann: „Guð þinn er lítill og trúin þín yfirskin mannvonsku. Þetta eru stór orð sem ég ætla að standa við, enda kallaður til að þjóna kirkju krists.“

Næst spurði ég prestinn hvaða rit hann væri að lesa því ekki virðist það vera Biblían sem ég taldi vera leiðarljós presta hjá Þjóðkirkjunni. Fátt var um svör.

Hann vildi ekki vísa í neina sérstaka ritningu og spurði ég hann þá út í þessa hér neðar, til að minna hann á hræsnina sem mér finnst hann sýna með orðum sínum og framkomu og alls ekki presti sæmandi.

„Því að réttlæti Guðs opinberast í því fyrir trú til trúar, eins og ritað er: Hinn réttláti mun lifa fyrir trú. Reiði Guðs opinberast af himni yfir öllu guðleysi og rangsleitni þeirra manna, er kefja sannleikann með rangsleitni.“

Rómverjabréfið 1: 17

Presturinn spurði mig hvort ég væri ekki til að hitta sig yfir kaffibolla og ræða innihald Biblíunnar.

Mér fannst þetta rausnarlegt boð og þakkaði honum fyrir að bjóða mér til tals um málefni sem mér er mjög hugfangið. Presturinn setti hjarta við svar mitt en um klukkutíma síðar var „auðmjúki“ presturinn búinn að „blokka“ mig og eyða svörum sínum. Þess má geta að ég og séra Sindri vorum ekki vinir á facebook, hann virðist því sérstaklega hafa komið inn á síðuna til að leggja orð í belg.

Það hlýtur að teljast til tíðinda að prestur sem vinnur við að tala fyrir Guðs orði, en einungis þegar það hentar, og finnast í lagi að mismuna börnum eftir kynhneigð. Sakar síðan fólk um mannvonsku fyrir það eitt að minna á Guðs orð sem er jú óhagganlegt samkvæmt hinni heilögu ritningu. Að sýnast fyrir mönnum er ekki Guði þóknanlegt, og samkvæmt orðinu er enn þyngri dómur sem býður þeirra sem sýna af sér slíka hræsni.

Það verður ekki betur séð en að Þjóðkirkjan stefni á hraðri leið til glötunar og hefur verið á undanförnum árum með Agnesi biskup sem stýrir sökkvandi skipinu. Biskupinn sem heimilaði eftirminnilega teiknaða mynd af Jesú Kristi sem kynlausu afkvæmi úrkynjaðrar stefnu kirkjunnar, þar sem Frelsarinn sjálfur og einkasonur Guðs var málaður með kvennmannsbrjóst, vara- og kinnalit að ógleymdu skegginu og í kvennmannskjól. Myndin var límd á strætisvagna borgarinnar í tvo mánuði. Agnes lét hafa eftir sér í útvarpsviðtali á Bylgjunni, að það skipti ekki máli hvernig Jesú var. Pétur Markan samskiptastjóri þjóðkirkjunnar tók svo undir orð biskups í viðtali við RÚV árið 2020.

Jú, það skiptir nefnilega höfuðmáli hver Jesú var og er. Við getum rétt ímyndað okkur uppþotið sem hefði orðið ef Múhameð spámaður hefði verið afskræmdur opinberlega af Þjóðkirkjunni með slíkum hætti.

Við sem þjóðfélag hljótum að gera kröfur til þess að þeir sem gegna háum embættum valdi því. Til að mynda þá þurfa lögreglumenn að sýna fram á hreint sakavottorð í starfsumsókn. Það er gerð krafa um að dómarar séu löglærðir og með dómgreind og siðferði í lagi. Við gerum meira að segja kröfu um að hárgreiðslufólkið sem við heimsækjum sé faglega menntað og að bifvélavirkinn sem gerir við bílinn okkar á bifreiðaverkstæði hafi menntað sig í faginu.

Eðlilega ætti sama krafa að vera gerð til presta Þjóðkirkjunnar og að þeir noti hina heilögu ritningu sem leiðarljós í starfi sínu, það er raunar gerð grafa um það í siðarreglum presta sem má sjá hér. Þar segir m.a í 2. gr. 1 og 9 mgr.:

Ég spyr mig því nú, af hverju gefur biskup Íslands afslátt af boðskap Biblíunnar og siðareglum presta og heimilar prestum að tala gegn Guðs orði og því sem Biblían boðar? Það flokkast undir fullkomna hræsni og er Guði ekki þóknanlegt eins og ritningarnar hér að ofan segja til um.

Það er því mörgum ljóst að byltingin hefur étið börnin sín og Þjóðkirkjan stefnir hraðbyr til glötunar samkvæmt Guðs orði.

Höfundur er áhugamanneskja um Biblíuna og Guðs orð, og ritstjóri Fréttarinnar.