Gengjaátök settu mikinn svip á lífið í Svíþjóð, og þá sérstaklega í úthverfum Stokkhólms, á síðasta ári. Samkvæmt upplýsingum frá lögreglunni urðu sprengjuárásirnar alls 90 og 63 voru skotnir til bana, sá síðasti á gamlárskvöld er tvítugur maður var drepinn á McDonalds í Vällingby, þar sem hann var gestkomandi og tveir aðrir særðust. Er sá tvítugi talin hafa verið skotmarkið.

Ekkert ábyrgt samfélag getur þolað fleiri en eina banvæna skotárás á viku auk alls ofbeldisins og glæpanna sem fylgja gengjunum segir Gunnar Strömmer dómsmálaráðherra. Stjórnvöld leggi nú mikla áherslu á að veita lögreglu og saksóknurum betri tól til að vinna gegn brotastarfssemi, svo sem leynilegar hleranir, að vitni megi vera nafnlaus og að lögregla megi leita vopna á tilgreindum svæðum.

Í Tidösamkomulaginu, hinum nýja stjórnarsáttmála, var barátta gegn gengjunum enda sett í forgang. Þar kom fram sú hugmynd úr smiðju Dana að tvöfalda refsingar fyrir meðlimi gengja, vísa fleiri slíkum úr landi og skoða möguleikann á  að takmarka búsetusvæði manna í allt að tíu ár eftir að þeir koma úr fangelsi. Reyna skuli og að fyrirbyggja að ungmenni leiðist út í glæpi.

Þekktasta fórnarlamb gengjastríðs ársins er trúlega Mehdi ”Dumle” Sachit (frá Írak) sem var drepinn á jóladagsmorgun. Við leit á heimili hans fannst milljóna virði sænskra króna í gulli, og mörg hundruð þúsund í seðlum, skv. Aftombladet.Hann var meðlimur Dödspatrullen sem hefur átt í útistöðum við gengið Shottaz. Hinir sómölsku leiðtogar gengjanna voru vinir þar til að slettist upp á vinskapinn 2015. Árið 2019 vakti aftaka tveggja meðlima Shottaz með kúlnahríð í Herlev, Danmörku mikla athygli og fannst Dönum sem sænsku gengin væru farin að færa sig full mikið upp á skaftið. Eftir dráp Dumle, sem var grunaður um aðild á drápi rapparans Nils ”Einár” Grönberg árið áður, hefur verið mikið um sprengju- og skotárásir á Stokkhólmssvæðinu. Margar þeirra virðast beinast að mönnum sem grunaðir eru um að hafa komið Einár fyrir kattarnef og í einu tilfellinu skutu 14 og 15 ára guttar á rangt hús þar sem ellilífeyrisþegi var einn heima.

Svíar munu almennt fagna dauða Dumle. Hann tók þátt í einni viðbjóðslegu hópnauðgun í sænskri sögu, og eru þær þó ansi margar. Hermt er að fórnarlambið sé enn, 7 árum síðar, svo illa farið af áfallastreituröskun og ótta við gerendurna að hún þori ekki einu sinni að láta foreldra sína vita hvar hún býr og hitti þá aðeins einu sinni á ári á opinberum stað. Dumle var dæmdur fyrir þátttöku í hópnauðguninni árið 2020 til 200 tíma samfélagsþjónustu á grunni DNA prufu sem hann fór í eftir að hafa verið tekinn fyrir að svíkja fé út úr mörgum öldruðum. Í drottningarviðtali hjá Ninu Svanberg, Expressen 2021 sagði hann frá spennandi lífi sínu í gengi og gengjastríðinu. Hún minntist á að hann hefði fengið dóma fyrir gróft ofbeldi og árásir auk fíkniefnabrota, en ekki á hópnauðgunina og fékk skömm fyrir. Í viðtalinu segir hann  að ekkert geti stöðvað átökin og menn eigi bara að leyfa þeim að drepa hvern annann þar til enginn sé eftir.