Eftir Þorstein Siglaugsson:
Dr. Richard Ennos, fyrrum prófessor í líffræði við Edinborgarháskóla fjallar um áróður bresks sjónvarpslæknis fyrir bólusetningu ófrískra kvenna í grein sem birtist hjá Daily Sceptic fyrir nokkrum dögum. Kveikjan að grein Ennos er nýlegt áróðursmyndband breskra heilbrigðisyfirvalda þar sem Dr. Viki Male, sem er sérfræðingur í meinafræði hvetur ófrískar konur eindregið til að þiggja bólusetningu við Covid og fullyrðir að fái þær sjúkdóminn séu líkur á fósturláti eða ótímabærri fæðingu 2-3 sinnum meiri en annars. Myndbandið má sjá hér.
Male fullyrðir að bóluefnin veiti 80-90% vernd gegn sýkingu, en eins og margoft hefur komið fram er þetta víðsfjarri lagi og sterkar vísbendingar um að bólusetningin auki fremur en minnki smitlíkur. Að lokum staðhæfir Male að engar vísbendingar séu um að bóluefnin auki líkur á fósturláti og vísar þar til nýlegrar rannsóknar sem sjá má hér.
Dr. Ennos, sem á að baki langan og farsælan starfsferil sem vísindamaður og háskólaprófessor og hefur ritrýnt mikinn fjölda vísindagreina bendir á fjölmarga galla í rannsókninni sem valdi því að engin leið sé að draga af henni þá ályktun sem Male dregur. Ennos bendir hins vegar á að gögnin sem rannsóknin notast við sýni þó eina marktæka niðurstöðu, en hún er sú að Astra Zeneca bóluefnið auki líkur á fósturláti um 17%.
Í lok greinarinnar beinir Ennos orðum sínum til Male:
„Svo þetta eru þá gæði þeirra vísindalegra sönnunargagna sem þú byggir málflutning þinn á COVID-19 bólusetningum fyrir barnshafandi konur á, dr. Male. Eina marktæka niðurstaðan sem kemur úr rannsókninni bendir til þess að að minnsta kosti eitt bóluefnanna auki hættuna á fósturláti snemma á meðgöngu. Ég tel að það eina sem er siðferðilega réttlætanlegt að þú gerir nú, sé að láta þegar í stað af áróðri fyrir bólusetningu ófrískra kvenna. Hér er ekki aðeins orðspor þitt sem er í húfi. Það sem er í húfi er framtíðarhamingja allra barnshafandi kvenna sem leggja traust sitt á þig vegna þess að þér hefur verið teflt fram sem vísindamanni og sem heiðarlegri manneskju.“